Андижон вилояти ички ишлар органларида хизмат қилаётган ёш ходимларнинг интеллектуал ва профессионал билим даражасини, маънавий-ахлоқий савиясини мунтазам равишда ошириб бориш, соғлом турмуш-тарзини тарғиб қилиш мақсадида,  улар ўртасида жорий йилнинг 25 май кунидан “Заковат” интеллектуал ўйинларининг саралаш босқичлари ўтказилиши бошланди. Саралаш босқичларининг 1-турида Андижон тумани ИИБнинг “Парламент”, Избоскан тумани ИИБнинг “Эверест” ҳамда Пахтаобод тумани ИИБнинг “Куч бирликда” жамоалари ўзаро баҳс олиб бордилар. Қизиқарли ва муросасиз ўтган ўйинлар натижаларига кўра “Парламент” ва “Куч бирликда” жамоаларининг ўзаро тўплаган баллари тенг келиб, қўшимча саволларга асосан ғолиб жамоа аниқланди. Саралаш босқичининг 1-тур ўйинларида Андижон тумани ИИБнинг “Парламент” жамоаси ғолибликка эришиб, финал йўлланмасини қўлга киритди.

26 май куни ўтказилган 2-тур ўйинларида Хонобод шаҳар ИИБнинг “Ёш куч”, Қўрғонтепа тумани ИИБнинг “Дўстлар”, Хўжаобод тумани ИИБнинг “Жасорат”, Булоқбоши тумани ИИБнинг “Ватанпарвар” ҳамда Жалақудуқ тумани ИИБнинг “Адолат посбонлари” жамоалари ақл майдонида ўзаро беллашдилар.  

Якунда Қўрғонтепа тумани ИИБнинг “Дўстлар” ҳамда Булоқбоши тумани ИИБнинг “Ватанпарвар” жамоалари бир хил бал тўплаб, финал йўлланмаси учун шиддатли ва муросасиз баҳс олиб бордилар. Ўйин сўнгига кўра Қўрғонтепа тумани ИИБнинг “Дўстлар” жамоаси финал йўлланмасини қўлга киритди.

Андижон вилояти ИИБ Ахборот хизмати