Andijon viloyati ichki ishlar organlarida xizmat qilayotgan yosh xodimlarning intellektual va professional bilim darajasini, maʼnaviy-axloqiy saviyasini muntazam ravishda oshirib borish, sog‘lom turmush-tarzini targ‘ib qilish maqsadida,  ular o‘rtasida joriy yilning 25 may kunidan “Zakovat” intellektual o‘yinlarining saralash bosqichlari o‘tkazilishi boshlandi. Saralash bosqichlarining 1-turida Andijon tumani IIBning “Parlament”, Izboskan tumani IIBning “Everest” hamda Paxtaobod tumani IIBning “Kuch birlikda” jamoalari o‘zaro bahs olib bordilar. Qiziqarli va murosasiz o‘tgan o‘yinlar natijalariga ko‘ra “Parlament” va “Kuch birlikda” jamoalarining o‘zaro to‘plagan ballari teng kelib, qo‘shimcha savollarga asosan g‘olib jamoa aniqlandi. Saralash bosqichining 1-tur o‘yinlarida Andijon tumani IIBning “Parlament” jamoasi g‘oliblikka erishib, final yo‘llanmasini qo‘lga kiritdi.

26 may kuni o‘tkazilgan 2-tur o‘yinlarida Xonobod shahar IIBning “Yosh kuch”, Qo‘rg‘ontepa tumani IIBning “Do‘stlar”, Xo‘jaobod tumani IIBning “Jasorat”, Buloqboshi tumani IIBning “Vatanparvar” hamda Jalaquduq tumani IIBning “Adolat posbonlari” jamoalari aql maydonida o‘zaro bellashdilar.  

Yakunda Qo‘rg‘ontepa tumani IIBning “Do‘stlar” hamda Buloqboshi tumani IIBning “Vatanparvar” jamoalari bir xil bal to‘plab, final yo‘llanmasi uchun shiddatli va murosasiz bahs olib bordilar. O‘yin so‘ngiga ko‘ra Qo‘rg‘ontepa tumani IIBning “Do‘stlar” jamoasi final yo‘llanmasini qo‘lga kiritdi.

Andijon viloyati IIB Axborot xizmati