Ўсиб келаётган ёш авлодни ҳозирданоқ ички ишлар органларига бўлган қизиқишини уйғотиш орқали етук кадрлар бўлиб етишишларини таъминлаш мақсадида Андижон вилояти ИИБ раҳбарияти ҳамда Касбий тайёргарлик бўлими ташаббуси билан жорий йилнинг 26 август куни вилоят ҳудудида яшовчи 12 ёшгача бўлган боқувчисини йўқотган болалар иштирокида мустақиллигимизнинг 30 йиллиги байрами муносабати билан тадбир ташкил этилди.

Тадбирга Андижон шаҳри ҳамда барча шаҳар-туманлардан жами 32 нафар 7 ёшдан 12 ёшгача бўлган болалар таклиф қилинди.

Дастлаб, болажонлар вилоят ИИБ Тиббиёт бўлимига олиб борилиб, тиббий кўрикдан ўтказилди. Шифокорлар томонидан уларга тегишли маслаҳатлар берилиб, керакли дори-дармонлар ҳамда фойдали витаминлар тарқатилди.

Шундан сўнг, вилоят ИИБ Патруль-пост хизмати ва жамоат тартибини сақлаш бошқармасига ташриф буюрдилар. У ерда хизмат автомашиналари ҳамда ички ишлар органлари ходимларининг махсус воситалари, хизмат отлари билан таништирилиб, ходимлар учун мўлжалланган овқатланиш жойида эрталабки нонушта ҳам ташкил этилди.

Андижон вилояти ИИБ Тезкор вазифаларни бажарувчи сафарбарлик отрядига қилинган ташриф ҳам болажонларда ўзгача таассуротлар қолдирди. Улар хизмат автомашиналари, махсус воситалар ва ўқ отар қуроллар билан яқиндан таништирилиб, барчанинг эътиборига кўргазмали чиқишлар намойиш этилди.

Шунингдек, болалар ўртасида «Турникда тортилиш», «Тош кўтариш», «Арғимчоқда сакраш» ва Пневматик қуролдан ўқ отиш «Мерганлик» спорт турлари бўйича мусобақалар ўтказилди.Улар учун уюштирилган концерт дастурида маданий ҳордиқ олдилар.

Бундан ташқари шу куни болалар вилоят ИИБ Кинология хизмати фаолияти билан танишиш учун олиб борилиб, у ерда хизмат итлари билан турли кўринишдаги чиқишлар намойиш этилди.

Тадбир якунида болалар вилоят ИИБнинг «Шон-шараф» музейига ташриф буюрдилар. У ерда Андижон вилояти ИИБнинг тарихи ҳамда у ердаги барча экспонатлар билан таништириб чиқилиб, уларга ўқув анжомлари, спорт кийимлари, китоблар ва байрам табрикномалари бошқарма бошлиғининг ўринбосари полковник Абдувоҳид Имяминов томонидан тантанали равишда топширилди.

Андижон вилояти ИИБ Ахборот хизмати