Андижон вилояти ИИБ раҳбарияти ташаббуси билан Мустақиллик байрами олдидан ходимлар учун арзонлаштирилган озиқ-овқат ярмаркаси ташкил этилди
Юртимизда байрамлар арафасида арзонлаштирилган озиқ-овқат ярмаркаларини ташкил этиш яхши анъанага айланган. Давлатимиз мустақиллигининг 34 йиллиги байрами муносабати билан республикамиз бўйлаб барча корхона ва ташкилотларда озиқ-овқат ярмаркаларининг ўтказилаётгани аҳоли учун катта қулайлик яратмоқда.
Хусусан, бугун 27 август куни Андижон вилояти ИИБ ЖХХ Жамоат тартибини сақлаш бошқармасида ички ишлар органлари ходимлари ва ишчи хизматчиларнинг оила аъзолари учун ташкил этилган арзонлаштирилган озиқ-овқат маҳсулотлари ярмаркаси ҳам фикримизнинг ёрқин тасдиғидир.
Савдо ярмаркасида ҳудудий таъминот корхоналари ҳамда деҳқон ва фермер хўжаликлари томонидан қорамол гўшти, қўй гўшти, тухум, балиқ, ўсимлик ва пахта ёғи ҳамда ун ҳамда ҳўл ва қуруқ мевалар, ширинликлар каби маҳсулотларини ҳамда мактаб ўқув-қуролларини қулай нархларда харид қилиш имконияти яратилди.
Байрам арафасида бу каби ярмаркаларни ўтказиб борилиши ички ишлар ходимлари ва ишчи хизматчиларнинг вақти тежалишига уларнинг оила аъзоларини эса байрамни тўкин дастурхон ила яхши кайфиятда қарши олишларига кўмак беради.
Андижон вилояти ИИБ Ахборот хизмати
