Жорий йилнинг 23 март куни Андижон вилояти ИИБ Жамоат тартибини сақлаш бошқармасида ИИВ Миграция ва фуқароликни расмийлаштириш бош бошқармаси бошлиғининг ўринбосари подполковник А.Я.Меҳмонов иштирокида ходимлар томонидан фуқароларни қабул қилишда хизмат интизоми ва қонунчиликка риоя этилишини таъминлаш юзасидан учрашув-мулоқот бўлиб ўтди.

Ушрашув-мулоқотда Андижон вилояти ИИБ Миграция ва фуқароликни расмийлаштириш бошқармаси ҳамда унинг жойлардаги тизимларида хизмат қилаётган ходимлар, уларнинг ота-оналари ва яқинлари иштирок этди.

Дастлаб, Ўзбекистон Республикаси Президентининг жорий йилнинг 8 февралдаги “Ички ишлар органлари ходимларини ижтимоий ҳимоя қилиш тизимини янада яхшилаш чора-тадбирлари тўғрисида”ги қарори асосида мамлакатимизда жамоат хавфсизлигини таъминлаш ва ҳуқуқбузарликларнинг олдини олиш соҳасида ички ишлар органлари фаолияти самарадорлиги оширилиши, ходимлар ва уларнинг оила аъзолари ижтимоий ҳимоя қилиниши тўғрисида атрофлича маълумотлар етказилди. Шунингдек, бугунги кунда ички ишлар органлари ходимларининг хизмат шароитларини яхшилаш, турар жой билан таъминлаш, фарзандларини олий ўқув юртларига қабул қилиш ҳамда тиббий хизматдан фойдаланишдаги имтиёзлар билан бирга хизмат фаолиятини самарали ташкил этиш учун яратилаётган қулайликлар ҳам тилга олинди.

Шундан сўнг, шахсий таркиб ўртасида хизмат интизоми ва қонунчиликка қатъий риоя қилиш, фуқаролар билан муомала маданиятини яхшилаш, тамагирлик ва бошқа салбий ҳолатларга йўл қўймаслик, ходимларнинг ҳуқуқий онги, билим савиялари, касбий маҳоратлари, дунёқарашларини оширишга қаратилган чора-тадбирлар ва бошқа масалалар ҳақида  атрофлича сўз юритилди. Очиқ мулоқот шаклида ўтказилган учрашувда ходимларнинг ота-оналари ҳам ўзларини қизиқтирган масалалар юзасидан саволлар беришиб, уларга атрофлича жавоблар олишди.

Тадбир сўнгида хизмат фаолиятида намуна кўрсатган бир гуруҳ ходимлар ва уларнинг ота-оналарига вилоят ички ишлар бошқармаси бошлиғининг ташаккурномалари тантанали равишда топширилди.

Андижон вилояти ИИБ Ахборот хизмати