Ichki ishlar organlari xodimlarining kasbiy, xizmat, jangovar va jismoniy tayyorgarliklarini oshirish, bilim saviyasini oshirish maqsadida tez-tez nazariy va amaliy bellashuvlar hamda sport musobaqalari o‘tkazish anʼanaga aylangan.

Tanlov va musobaqalar asosida shaxsiy tarkib o‘rtasida sog‘lom raqobat muhitini shakllantirib, eng isteʼdodli va istiqbolli kadrlarni aniqlab, rag‘batlantirish va qo‘shimcha ravishda qo‘llab-quvvatlash, shuningdek, maʼnaviy-maʼrifiy, jismoniy, jangovar, kasbiy tayyorgarlik faoliyatini tizimli ravishda tashkil etish orqali xodimlarni vatanparvarlik g‘oyalariga sadoqat, milliy va umuminsoniy qadriyatlarga hurmat ruhida tarbiyalash maqsadida Andijon viloyati ichki ishlar boshqarmasi huzuridagi Tergov boshqarmasi va uning quyi bo‘linmalari xodimlari o‘rtasida «Eng yaxshi tergovchi» ko‘rik- tanlovining viloyat bosqichi bo‘lib o‘tdi. Unda sohada xizmat qilayotgan tergovchilar va surishtiruvchilar ishtirok etishdi.

Dastlab, xodimlar turnikda tortilish, 100 va 3000 metrga yugurish hamda qo‘l jangi usullari bo‘yicha sinovlarni topshirdilar.

Shuningdek, ishtirokchilar belgilangan soniyalar ichida "Kalashnikov" avtomati va "Makarov" pistoletini to‘liqsiz qismlarga ajratish va yig‘ish amaliyotini bajarishdi.

Ular bilan o‘tkazilgan psixologik testda xodimlarning ruhiy holati va boshqa xislatlari o‘rganildi.

Ko‘rik-tanlovda tergovchilarning nazariy bilimlarini sinash maqsadida test sinovlari ham olindi.

Bundan tashqari, yakuniy shartda esa ishtirokchilar qonunchilikka kiritilgan o‘zgartishlar bo‘yicha og‘zaki savol-javobda ishtirok etishdi.

O‘zaro tajriba almashish va kasb mahoratini oshirishga yo‘g‘rilgan musobaqa g‘oliblari ko‘rik tanlovning Respublika bosqichiga yo‘llanmani qo‘lga kiritdi.

Andijon viloyati IIB Axborot xizmati