Andijon viloyati IIB boshlig‘ining topshirig‘iga asosan barcha shahar-tuman IIBlari huzuridagi tergov bo‘lim, bo‘linma va guruhlari tergovchilari va hududiy profilaktika inspektorlarining bilim saviyasini yanada mustahkamlash borasida navbatdan tashqari o‘quv mashg‘ulotlari o‘tkazilishi belgilandi.

Shunga asosan 28-aprel kuni Izboskan hamda Paxtaobod tumani IIBlarining profilaktika inspektorlari va tergovchilari uchun o‘quv mashg‘ulotlari tashkil etildi.

Unda dastlab, Andijon viloyati IIB huzuridagi Tergov boshqarmasi boshlig‘i podpolkovnik I.Fayzullayev tomonida jinoyat ishlarini tergov qilishda protsessual tartibga rioya qilish, tergov harakatlarini o‘tkazish metodlari, hodisa joyini ko‘zdan kechirish, eʼtibor qaratilishi lozim bo‘lgan holatlar, ayblanuvchini harakatlarini malakalash, xizmatlar bilan o‘zaro hamkorlik masalalari bo‘yicha ham atroflicha tushunchalar berildi.

Shuningdek, O‘zbekiston Respublikasi jamoat xavfsizligi konsepsiyasida belgilangan vazifalardan kelib chiqib, profilaktika inspektorlari tomonidan maʼmuriy bayonnomalarni rasmiylashtirish, ishni “Soatbay” tashkil qilish, mahalla raisi, hokim yordamchisi, yoshlar yetakchisi va xotin-qizlar faoli bilan ishlash, jinoyatchilikni oldini olish borasida “Xonadonbay” va “Fuqarobay” usulda ish tashkil qilish, shuningdek, jinoyat muhokamalarini tashkillashtirish masalalari bo‘yicha Huquqbuzarliklar profilaktikasi boshqarmasi boshlig‘i podpolkovnik X.Abduraxmonov tomonidan ham o‘quv mashg‘ulotlari olib borildi.

Bu kabi o‘quv mashg‘ulotlarining o‘tkazilishi shahar-tumanlarda davom ettirilmoqda.

Andijon viloyati IIB Axborot xizmati