Davlatimiz rahbari boshchiligida mamlakatimizning hamma jabhalari qatori ichki ishlar organlari faoliyatida ham tizimli va manzilli ishlar amalga oshirilmoqda.

Xususan, ichki ishlar organlarining moddiy-texnik bazasini mustahkamlash, xodimlarimizning ijtimoiy himoyasini yanada yaxshilash hamda ularni uy-joy bilan taʼminlash masalalariga alohida eʼtibor qaratilmoqda. Bu esa, oʻz navbatida, ichki ishlar organlari tomonidan fuqarolarning tinch va osoyishta hayot kechirishlari yoʻlida oʻz kuch-gʻayratlarini ayamay xizmat qilishlariga imkon beryapti.

Oʻzbekiston Respublikasi Vazirlar Mahkamasining 2017-yil 29-iyundagi “ichki ishlar organlari xodimlarini turar-joy sharoitlarini yaxshilashga doir qoʻshimcha chora-tadbirlar toʻgʻrisida”gi qarori asosida, bugunga qadar Andijon shahrining “Gʻayrat” koʻchasi, Qoʻshariq va Boʻston dahalarida jami 120 nafar xodimlar uchun koʻp qavatli uylar qurib bitkazilib, ichki ishlar vazirining 2018-yil 5-fevraldagi tegishli buyrugʻiga muvofiq vazirlik hisobidan har bir xodimlarga ipoteka krediti uchun dastlabki badal toʻlovlari toʻlab berildi.

Bu kabi xayrli ishlarning davomi sifatida joriy yilning 24-avgust kuni mustaqilligimizning 30 yilligi bayrami munosabati bilan xizmat faoliyatida hamkasblariga alohida oʻrnak boʻlib kelayotgan 15 nafar ichki ishlar organlari xodimlariga imtiyozli kredit asosidagi zamonaviy uy-joylar tantanali ravishda topshirildi.

Yangi uy-joylar bilan taʼminlangan xodimlar yaratib berilayotgan bu kabi shart-sharoitlarga, albatta, oʻzlarining halol mehnatlari bilan javob qaytaradilar.

Andijon viloyati IIB Axborot xizmati