Ichki ishlar organlari xodimlari nafaqat jismonan kuchli, balki maʼnan baquvvat ham boʻlishi kerak. Shuning uchun tizimda maʼnaviyat darslari muntazam tashkil etib kelinmoqda.

Shu bilan birga sohada xizmat qilayotgan xodimlarning iqtidor va isteʼdodlarini yuzaga chiqarishga zarur sharoitlar yaratilmoqda.

Tizimda sportda yuqori natijalarni koʻrsatayotgan xodimlar bilan birga sanʼat sohasida oʻziga xos isteʼdod sohiblari ham bor. Ular ichki ishlar organlari tizimida oʻtkaziladigan turli madaniy va maʼrifiy tadbirlarda faol ishtirok etib kelmoqda.

Vatanimiz Mustaqilligi bayrami arafasida Ichki ishlar vazirligi tomonidan “Sanʼatda havaskor isteʼdodlar” respublika koʻrik-tanlovi oʻtkaziladi.

IIV Madaniyat saroyida avgust oyining oxirgi oʻn kunligida boʻlib oʻtadigan tanlovda ishtirok etuvchi jamoalar uch shart asosida bellashadi.

Tanishtiruv shartida jamoalar oʻzini tanishtirishga oid koʻrinishlar, hazil-mutoyiba, kuy-qoʻshiq, raqs va boshqa yumoristik sahna koʻrinishlari bilan chiqish qiladi.

Ushbu shartda chiqish mazmunan jamoalar nomi, xizmat joyi yoki oʻzlari yashaydigan hudud tabiati, odamlar hayoti, oʻy-kechinmalari, xodimlar orasida uchrab turadigan salbiy illatlarni yumor orqali tanqid qilish, jamoaning boshqa oʻziga xos xususiyatlari haqida maʼlumotlar, lavhalar keltiriladi.

Qoʻshiqchilik shartida – jamoa aʼzolari maqom, baxshichilik va estrada yoʻnalishlarida yakka yoki jamoaviy tarkibda qoʻshiq ijro etishlari va ushbu qoʻshiqqa oʻz ijodkorligi asosida alohida klip yoki rolik namoyish etishlari lozim boʻladi.

Erkin mavzuda esa musiqalar, qoʻshiqlar, sheʼrlar, taniqli sanʼatkorlar qoʻshiqlariga oʻxshatmalardan keng foydalangan holda hayotda uchraydigan turli xil qiziq voqeliklar, illatlar, kamchiliklar kulgi ostiga olingan teatrlashtirilgan lavhalar namoyish etiladi.

Ichki ishlar organlarining havaskor jamoalar oʻrtasida “Yangi Oʻzbekistonda el aziz, inson aziz!” shiori ostida oʻtkazilgan “Sanʼatda havaskor isteʼdodlar” anʼanaviy-maʼrifiy koʻrik tanlovida respublika jamoalari oʻrtasida Andijon viloyati IIBning “Mardlar” jamoasi faxrli 2-oʻrinni egalladi.

Andijon viloyati IIB Axborot xizmati